Vuolgá Latin-Ameriikii

Mu Ruoktu lea mu váimmus

Buvttadeapmi gaskkal Beaivvás Sámi Našunálateáhtera, Kultur i Troms ja Riksteateret ja Veronica Salinas.

Mu Ruoktu lea mu váimmus čájálmas sisdoallá hástalusaid mat olbmuin leat máŋgga báikkis,  indiána ja sámi perspektiivas. Dán áigge lea lassánan ipmárdus máilmmi álgoálbmogiid birra, ja makkár árvu lea dološáigásaš kultuvrrain mat leat luonddus birgen.

Mu Ruoktu lea mu váimmus lea poehtalaš čájálmas luonddu birra ja mot leahkit olmmožin ja identitehta birra. Dát celkojuvvo muitalusaiguin, argentinalaš musihkain, luđiiguin ja divttaiguin. Veronica Salinas lea čállán teavsttaid  ja lassiteavsttat leat Nils Aslak Valkeapää (Áillohačča, gii vuittii Davviriikkaid ráđi litteratuvrra bálkkašumi 1991:s) ja Inga Juuso (2011 Spellemannbálkášumi vuoiti).

Buvttadus lea ovttasbargu Beaivváš Sámi Našunálateáhterin, Riksteaterin, Kultur i Troms ja Veronica Salinas. Golmmas leat lávddi alde: Inga Juuso (juoigi ja neavttár, Kultur i Troms), Veronica Salinas (neavttár) ja Per Einar Watle (čuojaheaddji). Haukur J. Gunnarsson (Beaivváš) lea bagadallin, Tine Thomassen (Riksteatret) lea dramaturga ja Berit Marit Hætta lea bivttashábmejeaddji.

Neavttárat

Inga Juuso lea beakkán juoigi, ja lea almmuhan skearruid ja doallan konsearttaid. Son lea bargan neavttárin máŋga Beaivváš buvttadusain, ja sus lei oaivugas rolla “Guovdageainnu stuimmiid” filmmas. Inga vuittii Spelemannsprisen  “Bárut” skearruin. Son lea bargan Romsa fylkkajuoigin 1999:i rájes.

Veronica Salinas lea dramatihkar ja neavttár, oahpu váldán Buenos Airesis.  Son lea čállán lávdeteavsttaid maid lea neaktán Nordic Black Teáhteris, Det Åpne Teater, Det Norske Teatret ja Riksteateris. Veronica vuittii  «Ođđa lávdeteavsttaid» bálkkašumi 2008:s, «Ident og Itet» monologa ovddas.

Čájálmasa musihkka

Per Einar Watle lea gitaristta  ja musihka vástideaddji. Son lea Norgga Siigeneriid jazza-gitaristtaid buoremusaid searvvis, ja son lea váldán oasi čuojahanjoavkkuin, filmmain ja teáhterčájálmasain. Son čuojaha ea Christiansand String Swing Ensemble joavkkus, Per Einar Watle Trios, Grupo Zanza, StringZone, Søyr, Latino Folk Joik ja eará.

Biktasat čájálmasas

Berit Marit Hætta lea hábmen biktasiid dán čájálmassii. Son lea dovddus bivttashábmejeaddji, govvideaddji, govvadoaimmaheaddji ja čájáhuslávdehábmejeaddji. Son vuittii Hedda-bálkkašumiid 2000:s buoremus bivttashábmema ovddas. 2011:s lágidii SIIDA Musea Suomas stuora bivttasčájáhusa gos čájehuvvo teáhterbiktasat maid son lea hábmen Beaivvážii.

Bagadallan

Haukur J. Gunnarsson lea teáhterbagadalli ja teáhterhoavda Beaivváš Sámi Našunálateáhteris. Son lea islándalaš, ja lea orron Norggas badjel 20 jagi. Son lea Japána teáhtera ja giela studeren golbma jagi. Dan maŋŋel fas teáhteroahpahusa Hull Universitys Englanddas.  Frilansbagadallin áigodagas lea bagadan badjelaš 60 čájálmasa davviriikkain. 2003:s oaččui UNESCO Uhcimura bálkkašumi iežas barggu ovddas go lea ovddidan Japána teáhter dáidaga davviriikkain.

Mihttojoavku: Nuorat ja rávisolbmot
Bistá  su 45 min.
Giella: Dárogiella ja sámegiella.

Fritt Ord ja Fond for Utøvende Kunstnere leat dorjon čájálmasa. Lásságámmi ásahus lea dohkkehan geavahit Áillohačča teavttaid. www.lassagammi.no.

Vuosttaščájálmas: Guovvamánnu 25.b. 2012 Beaivváš Sámi Našunálateáhteris Guovdageainnus. Nuppes čájehuvvo Beassášmárkaniid áigge Guovdageainnus cuoŋománu 4 beaivvi. Miessemánu álgogeahčen šaddá čájálmasmátki ea Romsii, Olmmáivággái, Kárášjohkii ja Áltái. Oslos čájehuvvo Máinnasfestiválas Dramatikkens Husas miessemánu 27 beaivvi. 2013:s lea ges guossečájálmasmátkis Latin-Amerihkkás.

Haukur J. Gunnarsson
15.02.2012