Mu Ruoktu lea mu váimmus čájálmas sisdoallá hástalusaid mat olbmuin leat máŋgga báikkis,  indiána ja sámi perspektiivas. Govas lea musihkar Per Einar Watle, bagadalli Haukur J. Gunnarson, musihkar ja neavttár Inga Juuso ja dramátihkar ja neavttár Veronica Salinas.

Hui earenoamáš čájálmas, celkkii Marry Áillonieida Somby Beaivváš Sámi Našunálateáhtera Stáinnak vuosttaščájálmasa birra. Beasaimet oaidnit spagga dievva sála, ja maŋŋel lei gudnejahttin neavttáriidda. Govas oaidnat Marry Á. Somby ja bagdalli Victoria Kahn.

Geahččit Guovdageainnus vuostáiválde bures Beaivváš Sámi Našunálateáhtera «Stáinnak» teáhterbihtá oasáža mii čájehuvvui Sámi Álbmotbeaivvi doaluin. Sin mielas orui bearaščájálmas hui suohtas.

Ja dal de mágihkalaš drámai mas leat ea. ea. ulddat, stállu, musihkka, illu ja gelddolašvuohta; Beaivváža čájálmas mii áibbas sihkkarit boahtá illudahttit olles bearraša, lea dal gearggus čájehuvvot. Geahča čájálmasa govaid, čájálmasas mas lea vuosttaščájálmas Guovdageainnus bearjadaga guovvamánu 10. B. ja mii dan maŋŋel johtigoahtá measta jo miehta Sámi. Ii leat eará go álgit illudit!

Dál vuollel guokte vahkku ovdal go Stáinnak galgá vuosttáš geardde čájehuvvot, de lea olu jo sajis ja doaimmas. Muhtin detáljat leat vel dieđusge báhcán, muhto eanas doaibma hui bures.